select language   Rěč/Sprache/Language
select language
Rěč/Sprache
file.title

Rozprawa rewizijneho wuběrka Domowiny z.t. k hospodarskemu wotličenju 2013 a 2014 na 17. hłownej zhromadźiznje 28.03.2015 w Haslowje

Lube sotry a lubi bratřa, lube sotšy, lube bratšy!

Česćeni delegaća a hosćo hłowneje zhromadźizny Domowiny!

Rewizijny wuběrk poda Wam dźensa rozprawu k wotličenju Domowiny z.t. w hospodarskimaj lětomaj 2013 a 2014.

16. hłowna zhromadźizna je do rewizijneho wuběrka Floriana Brězana, Měrćina Marka, Pětša Petricka, Dierka Šewca a Marka Wjeselu woliła. Tragiskeho znjezboženja našeho bratra Měrćina Marka dla ma so dźensa nowa čłonka abo čłon za wuběrk wuzwolić. Měrćin Mark wostanje nam ze swojim přećelnym, swědomitym a zasadźitym skutkowanjom za dobro Serbow w najlěpšim pomjatku. Budź jemu serbska zemja lochka.

Rewizijny wuběrk zetkaše so dohromady dwójce w zańdźenymaj lětomaj. Nimo toho pak běchmy po potrjebje w kontakće z financnym wotrjadom Domowiny z.t..

K pruwowanju předležeštej nam hospodarskej wotličeni za lěće 2013 a 2014 zarjada Domowiny a Domowinje přisłušaceje institucije RCW, kaž tež wotličenje Domowiny z.t. na Załožbu za serbski lud (Zzsl).

Pruwowanje přewjedźechmy 19. měrca 2015 a předpołožimy je z rozprawu k schwalenju dźensnišej hłownej zhromadźiznje. Financna rozprawa zarjada předleži Wam w delegatnych mapach na stronach 18 do 23.

Hospodarski wotrjad Domowiny z.t. je wuběrkej požadane podłožki w porjadnej kwaliće přidźěłał. Na naše naprašowanja k wužiwanju srědkow a k wotličenju dóstachmy stajnje spokojace a prawdźepodobne wujasnjenja.

Zjimajo zwěsćimy, zo wužiwachu so k dispoziciji stejace srědki w lětomaj 2013 a 2014 w zmysle zaměrow a nadawkow Domowiny, kaž je to w artiklu dwaj našich wustawkow zapisane.

Wažnosć je so při tym na spěchowanje projektow a nawabjenje srědkow třećich kładło.

Zmylki a njedostatki njejsmy na zakładźe předležacych podłožkow zwěsćili.

Při kontroli cyłkowneho wotličenja hospodarskeho plana 2013 a 2014 zwěsćichmy pozitiwnje, zo přesahuja dochody wudawki. We woběmaj lětomaj je potajkim plan wurunany.

Domowina z.t. da přez eksterneho dawkoweho pruwowarja hospodarsku rozprawu z bilancu zestajić. Tež zarjad załožby (ZzSL) pruwuje kóždolětnje wužiwanje srědkow w zmysle swojeho přizwolenja.

Tak garantuje so paralelnje prawosć předležacych ličbow, kaž tež pruwowanje powšitkownowužitnosće Domowiny z.t. Wšitke pruwowanske instancy wopodstatnichu, zo su so srědki wěcownje prawje a wotpowědnje nadawkam wužiwali.

Městny plan Domowiny z.t. je so ze snadnym wotchilenjom dodźeržał.

Kóždolětna přiražka Załožby za serbski lud ma wěstotu při planowanju dochodow a wudawkow zaručić.

Spagat mjez serioznym hospodarskim planowanjom a w běhu lěta so jewjaceje financneje potrjeby je kedźbyhódny a je zawěsće tež wšědnje znowa hoberske wužadanje za hospodarki.

Njepředwidźomne zalutownja dlěšodobnych chorosćow přistajenych abo wužiwanja staršiskeho časa dla, su so, wobkedźbujo zasady hospodarjenja, za wurunanje druhich titulow wužiwali, štož pak njeměło zasadny wupuć při wurunanju budgetowych wuskosćow być.

Potwjerdźimy na tutym městnje tu w rozprawje zarjada rysowanu trěbnosć, zo so wěcne a projektowe titule w přichodźe realnym płaćiznam a potrjebam přiměrja.

Zdobom zwěsćimy, zo měłoj so w zmysle dotalneje praksy, wašni spěchowanja ze skupinskej a ze župnej pawšalu na dobro dźěła při bazy dale wjesć.

Zalutowanje personalnych resursow, krótše puće a spěšniše wobdźěłanje, stringentniši přehlad na zwjazkowej a župnej runinje su jenož někotre z lěpšinow teju hač dotal korektnje wužiwaneju a wotličeneju spěchowanskeju gratow narodneho dźěła.

Facit: Cyłkownje zwěsćimy, zo su so spěchowanske předpisma wobkedźbowali a zo su so pjenjezy zmysłapołnje zasadźeli. Namjetujemy tuž delegatam dźensnišeje hłowneje zhromadźizny, předležacu financnu rozprawu Domowiny schwalić a Zwjazkowe předsydstwo ze zamołwitosće wuwjazać.

Wužiwam zdobom składnosć, so mojim sobukolegam rewizijneho wuběrka za spomožne zhromadne dźěło dźakować. Wutrobny dźak wuprajam w mjenje wuběrka sotře Mariji Pěčcynej a sobudźěłaćerkam financneho zarjada Domowiny za dobre wobhospodarjenje Domowinskeho budgeta a za pomoc při pruwowanju.

Wutrobny dźak za Wašu skedźbnosć.

Rewizijny wuběrk

Marko Wjesela

předsyda


Facebook Button