Namołwa k wobdźělenju na wubědźowanju Rěčam přichilena komuna – Serbska rěč je žiwa

Budyšin, dnja 3. februara 2017

K startej na dźensnišim dnju přepodadźa so Wam podłožki za třeće wubědźowanje wo rěčam přichilenu komunu – „Serbska rěč je žiwa“.

K prěnjemu razej je so tute wubědźowanje w lětomaj 2004/05 w serbskim sydlenskim rumje Swobodneho stata Sakska přewjedło. Tehdyši prezident krajneho sejma, knjez Erich Iltgen, je doporučił tute wubědźowanje kóžde pjate lěto přewjesć.

Rada za serbske naležnosće Sakskeje je so tuž za wospjetnu akciju w lěće 2017 rozsudźiła.

Wjeselimy so, zo je nětčiši prezident a čłon Sakskeho krajneho sejma, knjez dr. Matthias Rößler, znowa patronatstwo přewzał.

W zakonju wo prawach Serbow w Swobodnym staće Sakska (Serbski zakoń z dnja 31. měrca 1999) rěka w § 2 wotst. 3: „Das sorbische Volk und jeder Sorbe haben das Recht auf Schutz, Erhaltung und Pflege ihrer angestammten Heimat und ihrer Identität. Der Freistaat Sachsen, die Landkreise, Gemeindeverbände und Gemeinden im sorbischen Siedlungsgebiet gewährleisten und fördern Bedingungen, die es den Bürgern sorbischer Volkszugehörigkeit ermöglichen, ihre Sprache und Traditionen sowie ihr kulturelles Erbe als wesentliche Bestandteile ihrer Identität zu bewahren und weiterzuentwickeln.“

Wobydlerjo, wosebje pak komunalni politikarjo dwurěčneje Łužicy, su z wobědźowanjom wo rěčam přichilenu komunu namołwjeni, z nowymi a mnohostronskimi iniciatiwami wšědne wužiwanje serbskeje rěče spěchować a jej nowe rumy wotewrěć. Chcemy w zjawnosći wo wuznamje našeje maćeršćiny za kulturelnu wšelakorosć a bohatosć našeje łužiskeje domizny diskutować a zhromadne projekty nastorčić.

Dokelž staj dwaj krajej domizna Serbow, so tute wubědźowanje w Swobodnym staće Sakska a w Kraju Braniborska paralelnje přewjedźe, w Sakskej so pak samostatnje zahaji, zakónči a wuhódnoći.

Samozrozumliwje ma so wobkedźbować, zo skutkuje serbska rěč jako wažny mosćik k našim słowjanskim susodam.

Česćene knjenje, česćeni knježa komunalni politikarjo, lubi wobydlerjo,

po dźensnišim starće třećeho wubědźowanja ličimy z Wašim wobdźělenjom.

Čłonojo serbskeje rady Sakskeje, sobudźěłaćerki a sobudźěłaćerjo zarjadow Domowiny a Załožby za serbski lud su Wam při tym z radu a skutkom k pomocy.

Wupjelnjene podłožki a Waše prezentacije zwoprawdźenja, zo je serbska rěč we Wašej komunje žiwa, wotedajće abo pósćelće prošu hač do 31. decembra 2017 wotpowědnje připołoženemu informaciskemu łopjenju na zarjad

Załožby za serbski lud, Póstowe naměsto 2, 0262 Budyšin

pod hesłom: Serbska rěč je žiwa.

Jury ze zastupjerjow komunalneje politiki, Domowiny a załožby kaž tež čłonow Serbskeje rady Swobodneho stata Sakska wšitke zapodate podłožki wuhódnoći. Rěčam přichilene komuny so z wopismami, zjawnje wužiwajomnym logom a spěchowanskimi mytami wuznamjenja.

Mytowanske zarjadowanje wotměje so dnja 2. februara 2018.

Wšitkich wobdźělnikow wubědźowanja k tomu pozdźišo přeprošamy.