select language   Rěč/Sprache/Language
select language
Rěč/Sprache
file.title

2016/2017

Rozprawa stawizniskeje sekcije 2016/2017

 

Wot lońšeje hłowneje zhromadźizny Maćicy Serbskeje je stawizniska sekcija w Budyskim hosćencu „Wjelbik“ přewjedła tři zjawne zarjadowanja w rjedźe Maćičneje akademije. Běchu to:

7. apryla 2016 přednošowaše dr. Birgit Mitzscherlich, nawodnica archiwa, biblioteki a pokładnje Budyskeho tachantstwa, na temu „Stawizny a stawiznički ze Serbskeho seminara w Praze“. Přednošk bě w němskej rěči.

1. decembra 2016, wěnowachmy wječork 300lětnemu jubilejej Lipšćanskeje Sorabije, kotryž so tutón měsac woswjeći. Stawiznar Friedrich Pollack, wědomostnik Serbskeho instituta w Budyšinje, porěča na temu „Serbscy studenća we 18. lětstotku. Přinošk k (něhdźe) 300. jubilejej Serbskeho prědarskeho towarstwa w Lipsku“. Přednošk bě tohorunja w němskej rěči.

Lětuše reformaciske lěto wopominachmy 9. februara 2017 z přednoškom Serbskeho superintendenta Jana Malinka na temu "Luther a Serbja". Legendy a fakty". Jeho referat bě w serbskej rěči. Zwjeselace je, zo bě ličba wopytowarjow tutych třoch zarjadowanjow wyša hač w zašłej sezonje. Mějachmy najmjenje 15, najwjace 45 wopytowarjow, štož je dosć spokojace. Dźakować chcu so na tutym městnje hosćencarjam „Wjelbika“, kotřiž nas přeco přećelnje w swojej restawraciji hospoduja. Rjad Maćičneje akademije, kotryž smy nazymu 2009 załožili, chcemy tež w přichodźe dale wjesć. Namjety nowych temow a referentow su rady witane.

Jako přichodny je planowany za 30. měrc wječork z knjeni dr. Theresu Jacobsowej, wědomostnicu Serbskeho instituta w Budyšinje, kotraž budźe nam serbsku ludowu reju jako imaterielne kulturne herbstwo předstajić. Na tutón přednošk hižo nětko wšěch Maćicarjow přeprošuju.

Stawizniska sekcija ma tuchwilu 13 zapisanych sobustawow. Ju nawjedujetaj Trudla Malinkowa jako předsydka a dr. Edmund Pjech jako městopředsyda. Sekciske zhromadźizny wot lońšeje hłowneje zhromadźizny MS njejsmy přewjedli. Njemějachmy to za trěbne, dokelž so drobne přihotowanske dźěła w mjezsobnym zwisku dorěča.

 

Trudla Malinkowa,

předsydka