select language   Rěč/Sprache/Language
select language
Rěč/Sprache
file.title

Rozprawa dźěłaowśce sekcije stawizny 2010/2011

Wot lońšeje hłowneje zhromadźizny je stawizniska sekcija MS přewjedła štyri zjawne zarjadowanja Maćičneje akademije. Tutón rjad smy nazymu 2009 załožili, ze zaměrom serbskej a składnostnje tež němskej zjawnosći předstajić zajimawe temy ze serbskich stawiznow. Předwidźane su stajnje tři přednoški w jednej sezonje, potajkim w nazymje, w zymje a w nalěću. Wot lońšeje hłowneje zhromadźizny sem mějachmy sćěhowace štyri přednoški:

- 22. apryla 2010 porěča teologa dr. Hans-Jürgen Sievers z Lipska na temu „Oskar Pank – serbski duchowny, spowědny wótc Bismarcka a superintendent w Lipsku“. Bě to prěnje zarjadowanje, kiž přewjedźechmy w němskej rěči.

- 21. oktobra přednošowaše diecezanski archiwny rada n.w. dr. Siegfried Seifert z Budyšina na temu „Stawizny a wuznam putnikowanišća Róžant“.

- 27. januara 2011 porěča farar dr. Jens Buliš ze Smělneje na temu „Cyril a Metod jako misionaraj Łužicy? – Tradicija legendy“. Tu bě poprawom archeologiski přednošk planowany, kotryž pak dyrbjachmy na pozdźišo přesunyć. Dr. Bulišej słuša dźak, zo je krótkodobnje ze swojim přednoškom zaskočił, zo njeby zarjadowanje trjebało wupadnyć.

- 14. apryla přednošowaše dr. Doris Teichmannowa z Berlina wo temje „Pózdni srjedźowěk a zažny nowowěk we wuchodnej Delnjej Łužicy“.

Kaž so zda, so naš koncept jako kmany wopokaza. Mějachmy wěcywustojnych referentow a zajimawe temy. Wopyt zarjadowanjow bě dobry, zdźěla jara dobry. Z někotrymi temami docpěchmy tež šěrši publikum na wsach, kiž ma hewak lědma přistup ke kruhej Maćicarjow. W serbskich medijach žnějachu naše zarjadowanja zdźěla dosć wobšěrny echo. W zašłej sezonje nadpadnje, zo wěnowachmy so předewšěm cyrkwinskostawizniskim temam. To njeje naš prěnjotny wotpohlad a tež trochu sćěwk toho, zo je nam archeologiski přednošk wupadnył. Chcemy po móžnosći na wuwaženosć temow dźiwać a přednoški rozdźělneho razu poskićeć, zo bychmy šěroki publikum docpěli. Wutrobnje dźakować chcu so na tutym městnje Malinkec a Lukašec mandźelskimaj, kotřiž nas z Maćičnej akademiju zwólniwje do swojeho hosćenca „Wjelbika“ přiwzachu a nas w nim přeco přećelnje hospoduja.

Za přichodne lěto přihotujemy zaso tři přednoški Maćičneje akademije. Štóž ma nastupajo temy abo referentow namjety abo přeća, njech mi to prošu zdźěli. Nimo toho smy sobu zapřijeći do přihotow na 200lětny jubilej fararja Jana Kiliana. Hromadźe z ludowědnej sekciju MS a ze Serbskim institutom přihotujemy dwudnjowsku konferencu, kotraž ma so kónc septembra w tutej žurli w Serbskim muzeju wotměć.

Stawiznisku sekciju nawjedujetaj Trudla Malinkowa jako předsydka a dr. Edmund Pjech jako městopředsyda. Jako sekcija smy so wot lońšje hłowneje zhromadźizny MS jónu zešli, zo bychmy rjad Maćičneje akademije zestajili. Dalše zhromadźizny njeběchu trěbne, dokelž so drobne přihotowanske dźěła w mjezsobnym zwisku dorěčachu.

Hižo w swojej předlońšej a lońšej rozprawje běch na to pokazała, zo ma naša sekcija mało sobustawow. Mjeztym je so nam jedyn nowy čłon přidružił. Rady bychmy dalšich, wosebje młódšich čłonow kaž tež serbskich stawiznarjow a wučerjow stawiznow, mjez nami witali.

Trudla Malinkowa, předsydka