select language   Rěč/Sprache/Language
select language
Rěč/Sprache
file.title

Rozprawa sekcije ludowěda/muzejownistwo 2014/2015

1. Smy sej předwzali, w přichodźe zhromadne dźěło z Budyskim Serbskim muzejom dale pohłubšić. K tomu słuša, zo poskićeja so k wosebitym wustajeńcam wjedźenja.

To je so tež zwoprawdźiło:Naša sekcija a sekcija literatura/wuměłstwo Maćicy Serbskeje su 11. apryla 2014 do Serbskeho muzeja na wjedźenje přez wosebitu wustajeńcu “Jutrowne nałožki mjez herbstwom a eventom” přeprosyli. Wědomostna sobudźěłaćerka muzeja a čłonka našeje sekcije Andrea Pawlikowa je nam zaso eksponaty rozkładła. Tutón raz njejsmy z rezonancu na naš poskitk spokojom byli. Wobdźělichu so 2013 na tutón poskitku hišće 15 zajimcow, běchu to 2014 jenož hišće 5 wosobow. Tu dyrbimy našu wabjensku strategiju hišće jónu dokładnišo přemyslić.

Wothladajo wot toho chcemy lětsa zaso tajke wjedźenje poskićeć. Mamy hižo termin. Jedna so wo lětušu jutrownu wustajeńcu. Srjedu, 11. měrca 2015 přednošuje w 19.00 hodź. etnologowka Marita Andó z Lipska wo němskich a europskich nałožkach pod hesłom “Wot Swěčk Marije hač k swjatkam/ Von Lichtmess bis Pfingsten”. W předpolu so wjedźenje po wosebitej wustajeńcy poskići. A tutu składnosć chcemy wužiwać a našich čłonow a druhich zajimcow přeprosyć.

2.Kaž kóžde lěto je so zaso  dźěłowy kruh “Łužiske muzeje a muzealne zarjadnišća” zetkał. Kaž sym hižo posledni raz připowědźiła, smy sej zaso w Delnjej Łužicy muzej wupytali – mjenujcy wjesny muzej Zakrjow pola Baršća. Knjez Reinhard Natusch stara so w Zakrjowje wo dom a eksponaty hižo lěta dołho.

Ale smy zetkanje tež z dalšim zeńdźenjom zwjazać móhli. Runočasnje je so dźěłowy kruh “Łužyska muzejowa krajina” schadźował, kiž serbske muzeje a muzealne zarjadnišća w Delnjej Łužicy koordinuje. Tuchwilu su w tutym zwjazku 44 muzealnych zarjadnišćow, kotrež wustupuja ze zhromadnej internetowej stronu, zhromadnym logom a kotrež přihotuja hłownje zhromadnje nóc muzejow. Smy tu składnosć wužiwali a dźěławosć wobeju kruhow mjezsobu předstajeli. Wunoški zetkanja běchu, zo my w přichodźe bóle hromadźe dźěłamy, so husćišo zhromadnje zetkawamy a so bóle wuměnimy, na přikład štož nastupa internetowu prezencu, zhromadne wabjenje za nóc muzejow abo druhe poskitki. Andrea Pawlikowa předstaješe w swojim přednošku Hornju a Delnju Łužicu pod widom “serbska domizna”.

3. Pućowanska wustajeńca k 200. narodninam Jana Kiliana, kotruž je naša sekcija organizowała a zwoprawdźiła, je nětko swoje městno we Wukrančicach namakała. W juniju 2014 je zběrnik wo Kilianu pod titulom “Jan Kilian: pastor, poet, emigrant” wušoł, wudaty wot Trudle Malinkoweje. A składnostnje předstajenja knihi 1. julija 2014 we Wukrančicach móžeše naša sekcija pućowansku wustajeńcu do rukow Wukrančanskeje wosady přepodać.

 4. Předwidźany za lěto 2014 smy měli dalši dypk – pućować na slědach Měrćina Nowaka-Njechórnskeho. To so hišće njeje zwoprawdźiło. Chcemy pak to lětsa nachwatać. A jeli mamy konkretne informacije, podawamy je přez Serbske Nowiny.

5. A što mamy hišće za lětsa planowane? Nimo hižo mjenowanych předewzaćow, to rěka: wjedźenje přez jutrownu wustajeńcu w Serbskim muzeju (11.3.2015) a pućowanje na slědach Měrćina Nowaka-Njechórnskeho chcemy so zaso tradicionelnje w dźěłowym kruhu „Łužiske muzeje a muzealne zarjadnišća“ zetkać. Zetkanišćo pak hišće njeje jasnje.

6. A na kóncu hišće jednu informaciju štož předsydstwo našeje sekcije nastupa. Nowa předsydka sekcije ludowěda/muzejownistwo je Andrea Pawlikowa. Přeju Andreji wšo dobre a wěm, zo dźěło sekcije w dobrych rukach leži.


dr. Ines Kellerowa, předsydka

Budyšin, 28.02.2015