select language   Rěč/Sprache/Language
select language
Rěč/Sprache
file.title

Rozprawa sekcije literatura/wuměłstwo/wukraj 2015/2016

Přiznaju, zo je sekcija literatury, wuměłstw a wukraj hižo „tučniše lěta“ měła, hač tele.

Njedźelu dnja 3. meje 2015 stej Jašćanska Domowinska skupina a Maćica serbska spominali na Maćicarja fararja, stawiznarja a spisowaćela Jakuba Nowaka-Horjanskeho składnostnje jeho 150. narodnin. W ródnej wsy Hora pola Bóšic je so kamjeń postajił z wopomnjenskej taflu a swjedźenske zarjadowanje ze spěwami a narěčemi wobrubiło. Běše to hódne spominanje na nimale pozabyteho Maćicarja Jakuba Nowaka, předsyda sekcije je tam wopomnjeńske słowa rěčał.  

Ateljejowy wopyt pola serbskeje wuměłče mejachmy hižo wjele lět na planje a skónčnje je so předewzaće 1. awgusta 2015 z wopytom Maji Naglowej do Nossena poradźiło. Wjele časa a dleje hač předwidźane je Maja nam wěnowała a jara wobšěrnje swoje dźěło předstajiła. Pokazała je nam wšě móžne techniki wuměłstwa, kotrež so wona posłužuje. Čłonojo sekcije wužiwachu zdobom składnosć sej originalne wobrazy kupić.

W Praze přewjedźechu so 28.-30. awgusta 2015 Sakske kulturne dny we zastupnistwje Sakskeje kenclije a to po cyłym Serbskim seminarom. W mjenje předsydy Domowiny Dawida Statnika so na zarjadowanju wobdźělich a w postrownych słowach - spominajo na dwaj jubilaraj zańdźeneho lěta, na Jana Husa a Maćija Jakule wuprajich so tež w mjenje Maćicy.

Něšto pozdźišo běše ll. Pražski sorabisticki sympozium rězbarjej baroka Maćijej Jakuli - składnostnje jeho 360. posmjertnym narodnin - wěnowany a zarjadowanje wotměješe so dnja 27. nowembra 2015 w Serbskim seminarje. Mjez wjele přizjewjenjow - 21 referentami - běstaj dwaj Maćicarjej, Měrko Šołta a ja. Přednoški - ja rěčach wospjet k žiwjenju a skutkowanju Horsta Šlosarja - maja so lětsa jako kniha wudać.   

We wšelakich gremijach a wospjet je so přesydlenje Serbskeje kulturneje informacije won ze Serbskeho domu do Serbskeho ludoweho ansambla diskutowało.

K tomu sym jako čłon MS a župneho předsydstwa J. A. Smoler Budyšin wospjet swoje stejišćo zabrał a to tež w Zwjazkowym předsydstwje. SKI ma wostać hdźež je, zo by so z tym charakter Serbskeho zjawneho domu wobchował - w zmysle J. A. Smolerja, na kotrehož tu dźensa spominamy.

Předsyda sekcije je z čłonom Zwjazkoweho předsydstwa Domowiny a wobdźěla so prawidłownje na wuradźowanjach a informuje předsydstwo Maćicy wo wuslědkach. Runje tak je tež čłonom Mytowanskeho wuběrka Myta Ćišinkeho - woboje w nadawku Maćicy Serbskeje - a prócuje so we woběmaj gremijomaj wo fairne dźěło a dobre rozsudy. 

Je wšak tak, zo so tež čłonojo sekcije na přednoškach Maćicneje akademije stawizniskeje sekcije we Wjelbiku wobdźěleja. A wobdźěleja so tež na wotewrjenju wustajeńcow w Serbskim muzeju w Budyšinje a Chośebuzu, w Serbskej kulturnej informaciji w Budyšinje. Runje tak na knižnych premjerach LND kaž tež na čitanjach w Smolerjec kniharni jako publikum abo tež z čitanjemi. Su zdobom wobdźělnicy na zarjadowanjach ZSW, wosebje na Swjedźenju serbskeje poezije w tu- a wukraju abo na zarjadowanjach Přećelow Smolerjec kniharnje.

Čłonkam a čłonam sekcije - kotrejž přisłuša dale 24 čłonkow a čłonow - so za dźěło wutrobnje dźakuju a nadźijam so kaž kóžde lěto dalšeho dobreho zhromadneho dźěła.

Jedne předewzaće, kotrež smy sej w sekciji předewzali, njeje spjelnjene, mjenujcy, zo stajimy našemu čłonej dr. Janej Rawpej wopomnjensku taflu na row. A to zhromadnje ze ZSW a Serbskim institutom - a tež priwatnicy chedźa so wobdźělić. Naćisk jednoreje tafle je hotowy, ale čakamy hišće na připrajenje syna Kita Rawpa. Klětu je tomu 10 lět, zo smy Jana Rawpa pochowali, snano so nam hač do 13.9.2017 předewzaće poradźi.

Jurij Łušćanski, předsyda

Budyšin, 5.3.2016