select language   Rěč/Sprache/Language
select language
Rěč/Sprache
file.title

Rozprawa pomnikoweho wuběrka 2015/2016

Pomnikowy wuběrk Maćicy Serbskeje je gremij, w kotrymž so projekty nastupajo serbske pomniki předstaja, diskutuja a schwala. Doporučimy Załožbje za serbski lud, kotre projekty měła wona spěchować. To nastupa wobnowjenje starych kaž tež postajenje nowych pomnikow. We wuběrku dźěłaja sobu zastupjerjo z Hornjeje a Delnjeje Łužicy. Ze stron załožby skutkuje sobu knjez John Petrik, předsydka je Trudla Malinkowa. Wuběrk je so loni dwójce zešoł – jónu w nalěću hłownje k planowanju projektow, jónu w nazymje hłownje k bilancowanju dźěławosće.

W lěće 2015 su so někotre projekty z předchadźaceho lěta dokónčili:

1. W nošerstwje Maćicy Serbskeje je so wobnowiło rownišćo Jana Arnošta Smolerja a jeho swójbnych na Budyskim Hrodźišku. Předewzaće bě wulke wužadanje, dokelž bě prawnisce kaž tež technisce a financielnje wjele prašenjow rozrisać. Dźěło na tutym projekće staj hłownje wukonjałoj knjez Měrćin Wirth a předsydka wuběrka, wo čimž staj tež hromadźe w septemberskim čisle Rozhlada 2015 rozprawjałoj. Tak je row serbskeho wótčinca składnostnje jeho 200. narodnin nětk zaso w dostojnym stawje.

2. Domowinska skupina Łušć/Jaseńca je spočatk meje 2015 wotkryła pomjatnu taflu za Jakuba Nowaka-Horjanskeho w jeho ródnej wsy na Horje. Pomnikowy wuběrk MS je tu nimo financielneje wosebje tež skićił wobsahowu podpěru.

3. Na iniciatiwu Domowinskeje skupiny w Turjeju a Domowinskeje župy Delnja Łužica je so row Fryca Foba na Turjanskim pohrjebnišću w lětomaj 2014/15 wobnowił. Wopomnišćo bu we wobłuku Hłowneje zhromadźizny Maśicy Serbskeje kónc meje 2015 zjawnosći přepodate.

W lěće 2015 je pomnikowy wuběrk załožbje dwaj projektaj k spěchowanju doporučił:

1. W Brjazynskej cyrkwi so w běhu wjacorych lět tamniše znate freski wobnowjeja. Z hłownym pjenjezydawarjom při tym je Załožba Ostdeutsche Sparkassenstiftung. Załožby za serbski lud je restawraciju ze symboliskim přinoškom podpěrała.

2. Na próstwu Kamjenskeje župy Domowiny je so spěchowało inwentarizowanje katolskich nabožno-narodnych pomnikow w Njebjelčanskej wosadźe. Dźěło wukonjała je knjeni Trudla Kuringowa. Wuslědki so tež Serbskemu Institutej přepodaja a so tam archiwizuja. Inwentarizowanjje je na něhdźe wosom lět koncipowane a ma so lětsa w Ralbičanskej wosadźe pokročować.

Srjedź měrca změjemy přichodne posedźenje pomnikoweho wuběrka, hdźež chcemy sej lětuše předewzaća dorěčeć. Štóž ma nastupajo serbske pomniki namjety, što móhło abo dyrbjało so něhdźe zwoprawdźić, njech so prošu na nas wobroći.

Trudla Malinkowa, předsydka

Budyšin, 5.3.2016