Sprachwahl   Rěč/Sprache/Language
Sprachwahl
Rěč/Sprache
file.title

Změrcowski porjad Domowiny

(Wustawki změrcowskeho wuběrka)

1. Powšitkowne

(1) Zakład za dźěło změrcowskeho wuběrka su wustawki a program Domowiny. Jeho dźěło měri so na dodźerženje a skrućenje nutřkoorganizaciskich demokratiskich zasadow jednanja a na zachowanje prawa jednotliweho čłona.

(2) Změrcowski wuběrk skutkuje k wujednanju zwadow. Změrcowske jednanje so jenož na zapodatu próstwu wjedźe.

(3) Změrcowski wuběrk je w swojich rozsudach njewotwisny. Čłonojo[1] změrcowskeho wuběrka wukonjeja swoju dźěławosć njestroniće po najlěpšej wědźe a swědomju. Wobdźěleni na jednanju maja winowatosć, na wujasnjenju naležnosće sobuskutkować.

(4) Bjez přihłosowanja a dojednanja změrcowskeho wuběrka nima so wo naležnosćach wuběrka w zjawnosći rozprawjeć.

(5) Změrcowske jednanje ma zasadnje prioritu před zawołanjom rjadnych sudnistwow. Zranjenje jednanskich postajenjow po tutym změrcowskim porjedźe móže so jenož potom před rjadnymi sudnistwami přednjesć, hdyž su so z tym elementarne prawnostatne principije zranili a so rozsud na zranjenje tutych principijow złožuje.

2. Wutworjenje změrcowskeho wuběrka

(1) Změrcowski wuběrk so wot hłowneje wólbneje zhromadźizny Domowiny wotpowědnje wustawkam Domowiny art. 13 wuzwoli. Přistajeni Domowiny kaž tež čłonojo zwjazkoweho předsydstwa abo druhich organow Domowiny njemóža być z čłonom změrcowskeho wuběrka.

(2) Čłonojo změrcowskeho wuběrka wola ze swojich rjadow předsydu a městopředsydu.

(3) Městopředsyda zastupuje předsydu w padźe njepřitomnosće a/abo zajatosće.

(4) Zarjad Domowiny staji změrcowskemu wuběrkej jednoho referenta jako sekretara, zdobom protokolanta, k dispoziciji.

3. Nadawki

(1) Změrcowski wuběrk změruje konfliktne pady w zmysle wustawkow Domowiny, artikl 13, kotrež wustawki Domowiny a program Domowiny nastupaja. Změrcowski wuběrk předpołoži hłownej zhromadźiznje resp. zwjazkowemu předsydstwu namjet za změrowanje konflikta.

4. Zapodaće próstwy a jeje wobdźěłanje

(1) Změrcowski wuběrk skutkuje po dochadźe pisomneje próstwy. Próstwa ma předmjet zwady konkretnje mjenować a wopodstatnić. Próstwarjej a přećiwnikej poda so mjezypowěsć wo dochadźe próstwy w přiměrjenym času, najpozdźišo za 2 tydźenjaj.
W tutej dobje ma předsyda změrcowskeho wuběrka zwólniweho čłona změrcowskeho wuběrka zdobyć, kiž wjedźe z woběmaj stronomaj změrcowsku rozmołwu do zahajenja změrcowskeho jednanja. Z tym poskići změrcowski wuběrk změrowanje konflikta bjez jednanja. Wobě stronje matej prawo, tutu rozmołwu wotpokazać.

(2) Nastupa-li zwada rozsudy hłowneje zhromadźizny abo Zwjazkoweho předsydstwa Domowiny, ma so próstwa w běhu slědowacych 4 tydźenjow změrcowskemu wuběrkej zapodać. Po dochadźe próstwy rozsudźi změrcowski wuběrk w běhu
6 tydźenjow wo wašnju jeje wobdźěłanja.

(3) We wobzamknjenju wo wobdźěłanju próstwy ma so termin za ertne jednanje postajić. Tutón ma so wobdźělenym (próstwarjej a přećiwnikej) na jednanju bjez komdźenja, najpozdźišo 2 tydźenjaj do termina ertneho jednanja, posrědkować.
Ertne jednanje ma so najpozdźišo 6 tydźenjow po wobzamknjenju wo wobdźěłanju próstwy přewjesć.

(4) Namjety smědźa so hač do rozsuda změrcowskeho wuběrka cofnyć.

(5) Wopokaza-li so próstwa k zahajenju změrcowskeho jednanja jako njewoprawnjena, so wona wotpokaza. Rozsud ma so zapodarjej z mjenowanjom přičinow a z pokiwom na prawniske srědki w běhu dweju tydźenjow po wobzamknjenju zdźělić.

(6) Přećiwo wotpokazanju namjeta na zahajenje změrcowskeho jednanja móže próstwar w běhu 6 tydźenjow spřećiwjenje z podaćom přičiny zapodać a wo wospjetne wobdźěłanje prosyć.

5. Zajatosć

(1) Čłon změrcowskeho wuběrka smě sebje samoho za zajateho wozjewić a swoje sobuskutkowanje na jednanju wotpokazać.

(2) Wobdźěleni na jednanju smědźa próstwu podać, jednotliwych čłonow změrcowskeho wuběrka z jednanja wuzamknyć. Wo njej rozsudźi změrcowski wuběrk w tajnym wothłosowanju.

6. Protokol

(1) Protokol posedźenjow wuběrka ma wobsahować:

termin a městnosć wuradźowanja kaž tež dnjowy porjad,

mjeno nawody,

přitomnosć čłonow a hosći,

mjenowanje próstwy z mjenom zapodawarja a datumom dochada,

krótke komentary k wobjednanym wobsaham a

wobsah doporučenja na zwjazkowe předsydstwo.

(2) Protokol a/abo dalše podłožki jednanjow přepodaja so přez předsydu změrcowskeho wuběrka k składowanju w zarjedźe na zamołwiteho za datowy škit w zarjedźe. Woni maja so třećim jenož we woprawnjenym padźe a z dowolnosću wuběrka spřistupnić.

7. Wobdźěleni na jednanju

(1) Wobdźěleni na ertnym jednanju su próstwar a w próstwje ewtl. mjenowany přećiwnik. Na pisomnu próstwu jednoho z njeju smědźa so dalši na jednanju wobdźělić. Wo tym rozsudźi změrcowski wuběrk. Změrcowski wuběrk smě po trěbnosći dalšich do jednanja zapřijeć, tež na próstwu wobdźělenych stronow.

(2) Su-li wobdźěleni na jednanju gremije abo organy Domowiny, móža so tute w ertnym jednanju maksimalnje wot dweju čłonow zastupować dać.

(3) Wobdźělenym smě w jednanju jedna wosoba k pomocy być.

8. Wobzamknjenja změrcowskeho wuběrka

(1) Změrcowski wuběrk je z přitomnosću wjetšiny čłonow wobzamknjenjakmany.

(2) Rozsudy, to rěka namjety za změrowanje konflikta w zmysle artikla 13, wotrězk 3 wustawkow Domowiny, tworja so z wjetšinu přitomnych. Wobzamknje so zjawnje ze zběhnjenjom ruki, dalokož to wustawki hinak njepostajeja.

(3) Předsyda změrcowskeho wuběrka informuje předsydu Domowiny a jednaćela wo wobzamknjenju změrcowskeho wuběrka.

9. Ertne jednanje

(1) Změrcowski wuběrk rozsudźi wo swojim doporučenju w změrcowskim jednanju na zakładźe ertneho wuradźowanja. Jenož w dorozumjenju próstwarja a jeho přećiwnika smě so bjez njeju (bjez ertneho jednanja) namjet za změrowanje konflikta tworić.

(2) Předsyda změrcowskeho wuběrka postaji městno a čas ertneho wuradźowanja.

(3) Pisomne přeprošenje wobdźělenym na jednanju ma wobsahować:

městno a čas wuradźowanja,

mjena čłonow změrcowskeho wuběrka,

mjena dalšich wosobow, kiž so po § 7 (1) přeproša,

změrcowski porjad a

powučenje wo prawje, wěstych čłonow změrcowskeho wuběrka
wotpokazać směć.

(4) Próstwar a přećiwnik smětaj so we woprawnjenym padźe zastupować dać. Wuměnjenje za zastupowanje je pisomna połnomóc.

(5) Předsydka/předsyda změrcowskeho wuběrka nawjeduje ertne wuradźowanje a wudźěla prawo rěčenja.

(6) Njewobdźěli-li so jedyn z wobdźělenych ani na druhim ertnym wuradźowanju, smě so wone w jeho njepřitomnosći přewjesć.

(7) Wuradźowanja změrcowskeho wuběrka su njezjawne. Wo winowatosći mjelčenja so přitomni protokolarisce powuča.

(8) Elektroniske natočenje je jenož za protokolowanje z wot wuběrka skazanej techniku dowolene. Wo tajkim natočenju so na jednanju wobdźěleni informuja. Wužiwanje dalšich techniskich nastrojow njeje dowolene.
Natočenja so po wobkrućenju protokola a wotběženju doby spřećiwjenja zniča.

(9) Ertne wuradźowanje zakónči so ze stejišćom wobdźělenych. W kónčnym wozjewjenju smě so próstwa precizować. Poslednje słowo ma přećiwnik próstwarja.

(10) Namjet za změrowanje konflikta so wot změrcowskeho wuběrka w tajnym wuradźowanju bjezposrědnje po zakónčenju ertnych wuradźowanjow twori.

(11) Namjet za změrowanje konflikta je na próstwu wjazany. Wón smě so jenož na w změrcowskim jednanju předležace podłožki a na wuslědki ertnych wuradźowanjow złožować.

(12) Namjet za změrowanje konflikta a wobzamknjenje změrcowskeho jednanja smětej so, ma-li změrcowski wuběrk dalšu potrjebu k jednanju, na přichodne posedźenje přestorčić, dalokož so to z próstwu w jeje wobsahu znjese.

(13) Namjet za změrowanje konflikta so bjezposrědnje po wobzamknjenju w posedźenju próstwarjej a přećiwnikej z ertnym wopodstatnjenjom wozjewi. Wobzamknjenje a wopodstatnjenje matej w běhu 14 dnjow pisomnje předležeć a so wot předsydy a dalšeju čłonow změrcowskeho wuběrka, kotrajž staj so na jednanju wobdźěliłoj, podpisać. Rozsud so z wopodstatnjenjom, ručež móžno, wobdźělenym pósćele.

10. Nachwilny namjet za změrowanje konflikta

(1) Změrcowski wuběrk smě, jeli naležnosć chwata, nachwilny namjet za změrowanje konflikta we wěcy a bjez porjadneho jednanja tworić.

(2) Nachwilny namjet za změrowanje konflikta ma so w běhu 6 tydźenjow w porjadnym jednanju wobkrućić, hewak stanje so njepłaćiwy.

11. Prawniske srědki

(1) Spřećiwjenje přećiwo namjetej za změrowanje konflikta změrcowskeho wuběrka ma so w běhu 4 tydźenjow po wozjewjenju rozsuda pisomnje zapodać.

(2) Za spřećiwjenske jednanje płaća prawidła změrcowskeho porjada.

12. Nowe wobjednanje wotzamknjeneho jednanja

(1) Změrcowski wuběrk móže wotzamknjene jednanje na próstwu dotalnych wobdźělenych znowa zahajić, jeli so fakty předpołoža, kotrež njejsu za čas wobzamknjenja znate byli.

(2) Jednanja, kotrež su so bjez wobzamknjenja přez cofnjenje próstwy zakónčili, njemóža so znowa zahajić.

13. Kóšty

(1) Změrcowski wuběrk sej wot wobdźělenych (próstwarja a přećiwnika) narunanje kóštow nježada.

(2) Wobdźělenym so nastate kóšty přez změrcowski wuběrk njezarunaja.

(3) Nastupajo wudawki (jězbne kóšty, posedźenski pjenjez) su čłonojo změrcowskeho wuběrka čłonam zwjazkoweho předsydstwa runostajeni.

(4) Materielne a financne srědki za skutkowanje změrcowskeho wuběrka maja so přez zarjad zaručić.

(5) Městnosć zeńdźenjow změrcowskeho wuběrka je Serbski dom w Budyšinje. Wuwzaća su móžne.

14. Kónčne postajenja

(1) Po potrjebje je změna tutych wustawkow přez změrcowski wuběrk kóždy čas móžna. Wo płaćiwosći tutych změnow rozsudźi zwjazkowe předsydstwo abo hłowna zhromadźizna Domowiny.

(2) Jednotliwemu čłonej změrcowskeho wuběrka přewostajene podłožki su wobsydstwo Domowiny. Z nimi ma so dowěrliwje wobchadźeć. Při zakónčenju jeho sobudźěła maja so tute podłožki wróćić. Ze swójskimi zapiskami ma so wobkedźbujo datowy škit wobchadźeć.

(3) Předležacy změrcowski porjad nabywa dnja 12.04.2014 płaćiwosć.

 


[1] Muska forma měni wuraznje stajnje tež žónsku.


Facebook Button