Jednanski porjad Mytowanskeho wuběrka Zwjazkoweho předsydstwa Domowiny

§ 1 Nadawk

1) Mytowanski wuběrk rozsudźa wo spožčenju “Myta Domowiny”, “Myta Domowiny za dorost” a “Čestneho znamješka Domowiny” a doporuča zwjazkowemu předsydstwu wuznamjenjenje jednotliwcow z Čestnym čłonstwom Domowiny.
Čłonojo wuběrka su z mytowanja wuzamknjeni.
2) Přećiwo rozsudam mytowanskeho wuběrka je prawniski puć wuzamknjeny.
3) Zakład za rozsudy Mytowanskeho wuběrka su wustawki “Myta Domowiny” a porjad za spožčenje Čestneho znamješka Domowiny a pola Čestneho čłonstwa Domowiny wustawki Domowiny.

§ 2 Wutworjenje a zestawa

1) Zwjazkowe předsydstwo Domowiny woli čłonow mytowanskeho wuběrka na dobu štyrjoch lět. Wuběrk skutkuje, doniž njeje nowy wuběrk woleny.
2) Mytowanski wuběrk ma dźewjeć čłonow. Tući sej wuzwola předsydu/ku a městopředsydu/ku.
3) Čłonojo mytowanskeho wuběrka skutkuja čestnohamtsce. Za jich skutkowanje płaći “Rjadowanje za zarunanje wudawkow z čestnohamtskeho dźěła za Domowinu – Zwjazk Łužiskich Serbow z.t.”.

§ 3 Zwołanje posedźenjow

1) Wuradźowanje, w kotrymž wuběrk wo spožčenju “Myta Domowiny”, “Myta Domowiny za dorost” a Čestneho znamješka Domowiny" rozsudźi, wotměje so najpozdźišo 3 tydźenje do wuznamjenjenskeho zarjadowanja Domowiny.
Tři njedźele do toho předsyda/ka posedźenje zwoła a čłonam podłožki sposrědkuje.
2) Referent za kulturu Domowinskeho zarjada wukonja organizatoriske přihoty posedźenjow.

§ 4 Posedźenja

1) Předsyda/ka wuběrka posedźenja nawjeduje. Njeje-li předsyda/ka wuběrka přitomna, nawjeduje městopředsydka.
2) Posedźenja njejsu zjawne.
3) Referent za kulturu Domowinskeho zarjada so na posedźenjach z poradźowacym hłosom wobdźěla//wobdźěluje a je zamołwity za protokolowanje wotběha a rozsudow. Wón njesmě sobu wothłosować.

§ 5 Wothłosowanje/ wobzamknjenja

1) Mytowanski wuběrk je wobzamknjenja resp. rozsuda kmany, hdyž je wjace hač połojca čłonow přitomna.
2) Nimo rozsudow wo spožčenju “Myta Domowiny”, “Myta Domowiny za dorost” a “Čestneho znamješka Domowiny” wobzamkuje z jednorej wjetšinu wotedatych hłosow. Samsna ličba hłosow płaći w tutych padach jako wotpokazanje namjeta.
3) Za wothłosowanje wo spožčenju “Myta Domowiny”, “Myta Domowiny za dorost” a “Čestneho znamješka Domowiny” zestaja zarjad Domowiny lisćiny z mjenami kandidatow.
Kóždy/a čłon/ka wuběrka smě při wothłosowanju maksimalnje telko mjenow nakřižować, kelkož wustawki/porjad za wuznamjenjenje předwidźa.
4) Wothłosowanje wo spožčenju “Myta Domowiny”, “Myta Domowiny za dorost” a “Čestneho znamješka Domowiny” přewjeduje so tajnje.
Namjet za spožčenje wotpowědneho wuznamjenja je schwaleny, hdyž je wjace hač połojcu hłosow přitomnych čłonow wuběrka dóstał. Při runosći hłosow za namjety móže so wuše wothłosowanje přewjesć.


§ 6 Wobchadźenje z namjetami a rozsudami

1) Kóždy zapodaty namjet předsyda/ka wuběrka z pomocu referenta za kulturu pruwuje, hač wustawkam za “Myto Domowiny” resp. porjadej wo spožčenju “Čestneho znamješka Domowiny” wotpowěduje.
Wuznamjenjenje z “Mytom Domowiny”, “Mytom Domowiny za dorost” a “Čestnym znamješkom Domowiny” smě so wosobje jenož jónu spožčić.
2) Do wothłosowanja smě so kóždy čłon wuběrka ke kóždemu zapodatemu namjetej wuprajić.
3) Čłonojo mytowanskeho wuběrka su winowaći, ze zapodatymi namjetami kaž tež rozsudami wo spožčenju wuznamjenjenjow dowěrliwje wobchadźeć.
4) Hakle na dnju mytowanskeho zarjadowanja wuběrk/zarjad Domowiny medije wo mytowanych informuje.
5) Zapodaćeljo namjetow, kotrež wuměnjenjam wotpowěduja, ale njejsu dosć hłosow dóstali, so wo tym informuja. Wuběrk jich tež informuje, njeje-li namjet wustawkam wotpowědował. Namjet za jednu wosobu móže so maksimalnje  trójce za sobu zapodać.


§ 7 Zajatosć

1) Je-li kandidat za wuznamjenjenje přiwuzny prěnjeho stopjenja čłona mytowanskeho wuběrka, je tutón čłon z jednanjow a wothłosowanja wuzamknjeny.
2) Kóždy čłon mytowanskeho wuběrka je winowaty, rozsudźeć njewotwisnje wot swojeho ewentualneho čłonstwa w župje abo towarstwje.


§ 8 Płaćiwosć

Tutón jednanski porjad płaći wot 19.09.2023.


§ 9 Změny

Jednanski porjad móže so z dwěmaj třećinomaj hłosow wuběrkownikow změnić.